home page ?


Tuich cill que vant demandan
Si chantarai ogan mais,
Vuoill qe sapchon per que chan
O per cal razon m'en lays.
Non es mos chans tant venals
C'a totz sia comunals!
Q'en aquel temps vuoil faire ma chansso
Qan mieills m'estai d'amor e de razo.

E so m'en tarzatz ogan,
Car sonetz d'auzel no-m pais,
Ni fresca flors de vergan
Lo consir del cor no-m trais,
Que m'es tant durs e corals
C'a pauc seria mortals,
Don nuilla res no-m pot dar gariso,
Si ma dompna no-m vol far hoc del no.

Pels tortz que las dompnas fan
Torna dompneis en abais,
Que tant li mostron d'engan
Per que-l plus fis drutz s'irais!
Trobar en pot hom de tals--
Mas ieu non dirai ies cals--
Cui servit ai e volgra-n guizerdo
E preira-n ben esmend'en luoc de do.

Pois tot cant ma dompna-m man
M'es aissi delieitz e jais
Obezir de bon talan,
C'anc son mandamen non frais,
Gardatz si-m degr'esser sals,
Q'en patz n'ai sofertz mains mals--
Neus del sieu dan pogr'aver fait mon pro,
Mas anc no-m plac res q'a lieis non fos bo.

Q'ieu-l vau tot iorn reprosan,
Car on mieills li sui verais
Ella-m ment e-m vai trichan,
Ar ai ben dich qe savais,
Qu'il es fina e leials
Et ieu, messongiers e fals.
Perdrai la doncs si totz temps li perdo
Eu oc, c'ab mal deu hom vensser fello.

Mas li dangier son trop gran
Mas mentir en ai pel cais!
C'on plus en vauc cossiran
No-n conosc q'en re-s biais:
Be-n puosc doncs dir mas non als,
Car sa beutatz naturals
E-l gens parlars l'a mes'en tal resso
C'om qu'ill vol mal non troba compaigno.

Mais d'amic, los bes e-ls mals
Degr'om partir comunals,
Mas vos n'avetz lo gaug e-l pretz e-l pro,
Et ieu no n'ai mais ir'e cor fello.

Mantel, plus qu'enperials
Es, qu'en vos non a ren fals,
Or ni tessel ni fonda ni peno,
Ni mais ni meins no-i cove per razo.

Mon Pastoret vei sobre totz baro
De dompnejar e d'armas e de do.

Mon Audiart, si-m fos aitals cum fo,
Amer'ieu mais qu'ome desotz lo tro.