| |
|||
| prosody | miscellaneous |
Entre dos volers sui pensius Qe·l cors me ditz q'ieu non chant mais Et Amors no vol que m'en lais Mentre qu'el segl'estarai vius: De laissar agr'ieu razo Qe mais non fezes chansso, Mas per so chant car amors e jovens Restaura tot qant tol mesur'e sens. E s'anc nuill jorn fui esforcius D'esser adreitz, cortes e gais, Eras coven que m'i eslais Ab ditz et ab faitz agradius, Q'en tal dompn'ai sospeisso Qe·l sieu ric, car guizerdo Non pot servir nuills hom desavinens, Si tot s'es rics e poderos e gens. Ab aitals honratz seignorius Ai eu estat totz temps verais, C'afans ni pena ni esglais Ni nuills maltraitz no m'es esqius! Per que dien a lairo C'anc d'amor non fich mon pro! Menton, q'ahutz n'ai bes e gauzimens E n'ai sofertz dans e galiamens. Per bona dompna sui antius Qand ja fai ren don sos pretz bais. E car una dompneta·m trais, Tornarai m'en vilans mesclius Non c'a lieis sabria bo Si la tornav'en resso! C'a las avols non ten dan faillimens E prezo·is mais per gabs e per contens. De cui qe·is vol baisse sos brius Puois l'honors midonz mont'e nais, C'aissi cum la rosa e·l glais Gensson qan repaira l'estius, Ma dompn'a tot l'an sazo, Qu'il sap genssar sa faisso Ab bels semblans et ab coindes parvens Don creis sos pretz e sos captenemens. Per lieis am fontanas e rius, Bos e vergiers e plans e plais, Las dompnas e·ls pros e·ls savais, E·ls savis e·ls fols e·ls badius De la francha regio Don ill es e de viro! Que tant es lai viratz mos pessamens, Qe mais non cuig sia terra ni gens. N'Alazais de Boisanso Fai son pretz meillor de bo, E perda Dieu qui l'er desavinens, Pos tant gen sec sos bels comenssamens. Novel amor mi somo Qu'ie·l serva de tal razo: C'a Miraval sia totz establimens Dels bes d'Amor e dels verais covens. |
Metrical pattern: 577y