| |
|||
| prosody | miscellaneous |
Er ab la forsa dels freys, Quan totz le muns trembl'e bruj, Val mais solaz e domneys, E chans ab tot belh desduj, Qu'el temps quan fuelh'e flors nays! A seluy, qu'es pros e guays Contra l'us del temps e del mon, Bem par que bos cors l'en aon. En amors a manhtas leys, E de manhtas partz aduj Tortz e guerras e plaideys: Leu reven e leu defuy, Leu s'apaya, leu s'irays, E quj d'aisso l'es verays, Soven sospira de prion E manhs enuegz blan e rescon. Anc mais ni tan no-m destreys, Mas er m'a trobat ab cuj Mi mou paors et esfreys, E-m greug'e-m pren e-m destrui! Et eu ges per tan no-m lays Que lai, don mi mou l'esglays, Non tenha mon cor deziron, On plus lo dezirs me cofon. La grans beutatz que pareys En la belha cui homs suj, E-l rics pretz q'a totz jorns creys, M'a tout domneyar d'autruj! Mas us dous esgartz m'atrays Vas la belha, don jamais Non temsera fam, freg ni son, S'agues cor del dig que-m respon. Pero, si tot s'es gabeys, Mos bos respieitz me conduy, E si-m dizia sordeys, No vuelh tornar lai don fuy. Pus vengut es als assays, Poder a que-m derc'o-m bays, Qu'ieu no-l fug, si-m ra o si-m ton, Ni ja no vuelh saber vas on. S'a Lombers corteja-l reys, Tostemps mais er joys ab luy! E, si tot s'es sobradreys, Per un pretz li-n venran duy: Que la cortezi'e-l guays De la belha n'Alazais, E-l fresca colors ab pel blon Fan tot lo segle jauzion. Dona, tan vos suy verays Que de totz cortes assays Vuel qe Miravalh vos aon, Mas non aus dir qals etz ni don. Per mon Audiart suy guays, Que tota gens ad eslays Prezon mais lo comte Raimon De nulh autre comte del mon. |