prosody | miscellaneous |
Anc trobars clus ni braus Non dec aver pretz ni laus, Pus fon faitz per vendre Contra-ls sonetz suaus Conhdetz, aissi com ieu-ls paus, E leus ad aprendre, Ab bels ditz clars e gen claus, Que per far entendre Non cal trop contendre. Car tan prenon cabaus Donas entrels fis los faus, Fan amor dissendre! Mas non tanh qu'ieu las caus, Ni de tot en tot no m'aus Vas lur dan estendre, Quar silh que-m ten en repaus Me fa-ls tortz defendre Qu'a mains drutz vei prendre. Tot quan vol midons vuelh, E tot quan li platz acuelh En patz ses rancura. Et s'ieu anc dis orguelh Vas donas, aras m'en tuelh E-m torn a mezura: E drutz qu'es d'aital escuelh Conquier joy qe-l dura Si-n bon luec s'atura. Qar l'am mais que non suelh, En trac piegz, e pus m'en duelh Quar silh no-n pren cura. Pus alhors no-m destuelh, E josta lieys me despuelh Nutz ses vestidura, Aitan tenc de ric capduelh Que bon'aventura No-m pot far fraitura. No sai per quals mestiers Amon donas cavaliers, S'amors me soana. No-m vuelh gabar estiers, Quar menhs en par vertadiers Qui totz sos bes vana! Per qu'eu vuelh plus voluntiers Dir cortez'ufana Que vertat velana. Los pejors lauzengiers Tenc per midons plazentiers, E cel que-ls apana: E si-l menres portiers Fos tan guays ni prezentiers Qu'auzes vestir grana, Tan fora rics sos loguiers Qu'en tela renzana Jagr'en sa cabana. |