| prosody | miscellaneous |
Cel que no vol auzir chanssos De nostra compaignia-is gar, Q'eu chan per mon cors alegrar E per solatz dels compaignos, E plus, per so q'esdevengues En chansson c'a midonz plagues! C'autra voluntatz no-m destreing De solatz ni de bel capteing. De la bella, don sui cochos, Desir lo tener e-l baisar, E-l jazer e-l plus conquistar, Et apres, mangas e cordos, E del plus qe-il clames merces! Que jamais no serai conques Per joia ni per entresseing, Si so q'ieu plus vuoill non ateing. Pauc val qui non es enveios, E qui non desira-l plus car E qui no s'entremet d'amar, Greu pot esser gaillartz ni pros! Que d'amor ven gaugz e ven bes, E per amor es hom cortes, Et amors dona l'art e-l geing Per que bos pretz troba manteing. Ben es savis a lei de tos Qui drut blasma de follejar! C'om, des qe-is vol amesurar, Non es puois adreich amoros, Mas cel q'en sap far necies, Aquel sap d'amor tot qant n'es: Eu no-n sai trop ni no m'en feing, Ni ja no vuoill c'om m'en esseing. Ben aia qui prim fetz jelos, Qe tant cortes mestier saup far! Qe jelosia-m fai gardar De mals parliers e d'enojos, E de jelosi'ai apres So don mi eis tenc en defes Ad ops d'una, c'autra non deing, Neis de cortejar m'en esteing. E val mais bella tracios Don ja hom non perda son par, C'autrui benananss'envejar. Qan Dieus en vol ajostar dos, De dompna vuoill qe-il aon fes E que ja no-il en sobre ies, Per que m'enquier'on vau don veing, Pus del tot al sieu plazer teing. N'Audiartz, de vos ai apres So don a totas sui cortes: Mas d'una chan e d'una-m feing, E d'aqella Miraval teing. E trobaretz greu qi-us n'esseing D'amar, pus eu de vos n'apreing. |