| |
|||
| prosody | miscellaneous |
Contr'amor vau durs et enbroncs Per que mos chans es trop loindâs, Q'ieu non sui tant leugiers ni vâs Qe ja longamen atenda So don non posc esser segurs! Que de dompna, pois ment sos jurs, Non sap drutz en qe s'enprenda. E de qe·m dei alegrar doncs S'ab lieis, on es pretz sobeirâs, Non puosc trobar ditz segurâs Ni ai poder qe·l carvenda, Si·m fai tortz ni semblans escurs Q'el mon non es rocha ni murs Que contra liei mi deffenda. Ab fals digz et ab termes loncs Fant dompnas de cortes vilâs, C'us non es tant francs ni humâs Qe·l coratge no·ill n'ensenda Qand autre pren los sieus endurs! Mas ieu no·n fatz tant grans rancurs Ni pois mort non qier esmenda. Ara mentre q'es l'ombr'els joncs E lo temps es clars e doussâs, Devon dompnas ben far certâs Celz qe·il plai q'en lieis s'entenda! E s'ieu n'ai ditz mainz motz tafurs, Merces que fraing mainz fortz aturs Prec que ma dompna mi renda. Si cum la ros'entre mil troncs Es genser flors qe d'autres grâs, Entre fals lausengiers trafâs Estai midonz en sa tenda, C'us no·il ten dan d'aquestz perjurs! Gen comensset ab bos agurs Pretz que per lor non dissenda. Venganssa de colps ni d'estoncs Non es d'amor ni de sas mâs, C'ab bels digz avinens e plâs Taing que pros dompna contenda! Que, pos trop tenss'ab braus digz durs, Non es sos pretz tant cars ni purs C'om alques no la reprenda. Dompna·m don Dieus que defenda De Miraval las tors e·ls murs, Pois vostre talans es tant durs Que no·us platz q'encar lo·us renda. |
Metrical pattern: 743d