| |
|||
| prosody | miscellaneous |
Bel m'es q'ieu chant e coindei Pois l'aur'es dous'e-l temps gais, E per vergiers e per plais Aug lo retint e-l gabei Que fant l'auzeillet menut Entrel vert e-l blanc e-l vaire! Adoncs se deuri'atraire Cel qe vol c'amors l'ajut Vas chaptenenssa de drut. Eu non sui drutz mas dompnei, Ni non tem pena ni fais, Ni-m rancur leu ni m'irais, Ni per orguoill no m'esfrei! Pero temenssa-m fai mut, C'a la bella de bon aire Non aus mostrar ni retraire Mon cor qu-ill tenc rescondut, Pois aic son pretz conogut. Ses preiar e ses autrei Sui intratz en greu pantais Cum pogues semblar verais Si sa gran valor desplei, Q'enqer non a pretz agut Dompna c'anc nasqes de maire Qe contra-l sieu valgues gaire! E si-n sai maint car tengut Que-l sieus a-l meillor vencut. Ben vol q'om gen la cotrei, E platz li solatz e jais, E no-ill agrad'om savais Que s'en desgui ni fadei. Mas li pro son ben vengut, Cui mostra tant bel vejaire, Si qe chascus n'es lauzaire Qan son d'enan lieis mogut, Plus qe s'eron siei vendut. Ja non cre c'ab lieis parei Beutatz d'autra dompna mais, Que flors de rosier qan nais Non es plus fresca de lei, Cors ben fait e gen cregut, Boch'et oills del mon esclaire! C'anc Beutatz plus no-i saup faire, Se-i mes tota sa vertut Qe res no-il n'es remasut. Ja ma dompna no-is malei S'ieu a sa merce m'eslais, Q'ieu non ai cor qe-m abais Ni vas bass'amor desrei, C'ades ai del mieills volgut Defors e dins mon repaire! E de lieis non sui gabaire, Que plus no-i ai entendut Mas gen m'acuoill'e-m salut. Chanssos, vai me dir al rei Cui jois guid'e vest e pais, Q'en lui non a ren biais, C'aital cum ieu vuoill lo vei! Ab que cobre Montagut E Carcasson'el repaire, Pois er de pretz emperaire, E doptaran son escut Sai Frances e lai Masmut. Dompn'ades m'avetz valgut Tant que per vos sui chantaire! E no-n cuiei chanson faire Tro-l fieu vos agues rendut De Miraval q'ai perdut. Mas lo reis m'a covengut Que-l cobrarai anz de gaire, E mos Audiartz Belcaire: Puois poiran dompnas e drut Tornar el joi q'ant perdut. |