| prosody | miscellaneous |
A Dieu me coman, Bajona, Cal diable t'an tengut Cant est sirventesc no·t sona, Ben t'en deus clamar perdut, Qu'ieu t'agra dat caval maucut Ab sela de Carcassona Et entressenh et escut De la cort de Narbona. A Dieu me coman, Bajona, Tan paupre·t vey a sobrier, Mas vestit ab avol gona! Mas ie·t trairai de pauprier Ab un sirventesc que·t profier, Tal que cent don hom sermona, Que·t valra mais que denier, Ni que rauba fort bona. Ins el Carcasses te planta, Mas er no·t nomni·ls baros, C'obs n'i aurian caranta Sirventes a dir los pros! Car greu triar fay un ni dos Mest corteza gent aitanta! E tu pren los guizardos E pueis d'aqui t'avanta. Passaras a Carcassona, Iras a'n Peire Rotgier, E s'il be e gent no·t dona, Ye·t doblarai ton loguier: E pueis iras a n'Olivier Que·t dara rauba gordona De saun vairet leugier, O dels draps de Narbona. Bajona, pauc te sojorna E vai t'en a'n Gent Esquieu, Qu'el no·t fara cara morna C'om pus alegre no vieu! Ans te dara caval braidieu, Tal que ben cor e biorna, E vestimenta d'estieu Ben estan et adorna. A'n Bertran de Saissac chanta Sirventes e mais chansos, E di·l que no·s tenh'az anta, Car premier non l'ai somos! Et ja de luy no·t partras blos, C'un caval c'a col de ganta No·t don per amor de nos Si dars non l'atalanta. A n'Aymeric vay t'en cochos Que ta nessieira t'escanta Per caval que't sia bos Ab cabestr' et ab manta. |
Metrical pattern: 302c