prosody | miscellaneous |
Grans mestiers m'es razonamens Qu'ieu a Mataplana envi, Pois n'Ugetz m'a mes el cami De dire motz braus e cozens. E car m'a ses desfianssa Cantat sol per devinanssa D'aisso don eu non sui gair'encolpatz, Mas trop n'a pres gran gatge Segon q'ieu ai faich petit de follatge. Anc trobars no-m fon desplazens, Ni chan ni solatz non desfi, Ni moiller non longiei de mi Per conseill de menudas gens! Q'ieu non ai d'als esperanssa Mas d'amor et alegranssa, Et en dompnei ai mes tans bels percatz E tant cortes usatge, Qe-il drut de sai m'en porton seignoratge. Ja nuills Catalans avinens No-s taing per aisso m'atahi, Que cavalliers q'en pretz se fi Deu laissar, so-ns mostra jovens, Moiller que pren per enfanssa! Mas si sa dompna l'enanssa Tant qe-l prenda, estre deu estacatz D'un certan homenatge, Qe ja nuill temps non seg'autre viatge. Ja-l reproviers non l'er garens A n'Huget qe-m dis en lati! Que de lui dizon siei vezi Q'en aisso es desconoissens, Qe per amor de na Sanssa Estai, c'aillors no-is bobanssa! E puois q'el vol estre totz moilleratz, Ja no-i aiam dampnatge Nos autre drut que seguem dreich viatge. La dompna q'es bell'e plazens Lais Dieus venir lai on hom ri, Et el nostr'alberc atressi Nos don cortejadors plazens Ab moiller qe-ns fass 'honranssa! Et ieu non ai d'als fianssa, Mas dels bels digz ab avinen solatz E l'amoros visatge Qe son dels huoils al cor privat messatge. Na Sanssa, dompna, pric vos qe castiatz N'Uget de dir follatge, Q'ieu-m lais per vos que plus fort no l'engatge. |