prosody | miscellaneous |
Dona, la genser c'om demanda, Sel qu'es tot en vostra comanda Vos saluda, apres vos manda D'amor aitan can pot ni sap. E sie-us play, dona, que ses gap O entendatz del premier cap Tro en la fi, Entendre poiretz be aisi Qu'el non a talan que-s cambi! C'a vos s'adona. Avinen dona, bel' e bona, Tals es lo pretz que hom vos dona, :que segurs es sel que-us razona C'om no-l dementa, Ans es ben dreitz c'om lo-y cossenta. Car valetz may et es pus genta Que no es neguna, Que non y a blanca ni bruna, Disnada d'amor ni dejuna Que aitan valha. D'aiso poiri' esser baralha, Mas per tal que negus no-y falha Ni so albir, Qu'ieu vuelha per plazer mentir, An ar conoisser ab ver dir, Per cal manieyra Deu anar vostr'amor premieira! Car vostr'amor lor es enteira E de ricx fatz E no-us siec mal crims ni retratz, Don ja sia tensos ni platz Per vostre dan. Lials es e ben ses enjan, Que anc no-us plac nulh vil deman Dezavinen. Pro es ab bel aculhimen E sabetz a malvada gen Esser esquiva. Pero a totz es agradiva E pels pus pros nominativa De bon solatz, C'ades dizon que melhuratz, E plazon may on pus parlatz Vostre saber. De so don non avetz voler, Sabetz vos gen donar lezer, Can y a loc. E anc vostra honor no-s moc, Can volgues ren, si no vos poc Esser enans. Vostre beutat que es tan grans Sabetz ben doblar ab semblans, E anc un dia Vostre fin pretz ab carestia. Sabetz ben amar tota via A gran honor. Aital pretz et aital valor Vos abandona say amor Senes vergonha, Car non y a una tan conja Non pogues estar ses vergonja Ab l'amistat. Per aiso dona-us ai comtat, Co vos sapchatz ves veritat E enquer mays, Que-us es grans honors e grans jays, Que cascun jorn vos creys e-us nays Bon'aventura, Que de tal amic es segura, C'aisi es de vostra mezura Que no-y falh res, E conoys totz los autres bes E del mal que non y a ges Es conoissens! A cuy vostres bels ditz plazens E dels cuendes ditz avinens Poiretz despendre. E sel que-us sabra ben entendre, Poira bona via pendre Segon la vostra. Encaras may vos dic e-us mostra, C'amor de dona e la vostra So vol selar. Pus breu vos manda e pus car Qu'estrans li son aquestz afar Vostre e sieu. Pus car vol o mand'e pus brieu, Que no-us auza querre a Dieu Per vostre nom. E pus de sel que sap don som E sap be la razitz e-l som, Si d'el s'en gara, Ben podetz saber com l'esgara! Per que-l seretz a tort amara, Si-l fai.. .. .. .. .. .. .. Pueys dels bes que far li vulhatz Non perdretz ja los vostre gratz, Si-l fai.. .. .. .. .. .. .. Per que-l camjaretz per autruy Car dona deu gardar per cuy Sia amada! Car mot a bona destinada Dona qu'es lialmen amada Per son amic. E qui-l trob'aital co yeu dic No-l deu jes camjar per pus ric Desconoissen, C'amor de drut ni d'entenden Non es pueys a sidons guiren, Pus la cauzida. Don amaretz, sie-us a-i fenida, Per sel que jamais a sa vida No-s vol partir De vos ni del vostre servir, E sie-us plai tan jen obezir Ni tan onrar, Que so c'az autruy vos es car Vas luy que vos pot tant amar Vos su .. .. .. .. .. Que non trobariatz en mil Un tan sofren ni tan humil Ni tan lial. Dona, no-us o tenguatz a mal Que forsa d'amor natural M'en fa tan dire. E, s'a vos play, podetz m'ausire, Que vas vos ges no-m puesc desdire Ab p... d'esfortz. E si-m faitz be, yeu soi estortz, E si-m voletz mal, yeu soi mortz, Dona |