| |
|||
| prosody | miscellaneous |
Er quant florisson li verger Eill auzel chanton per lor jai, Voill far ab gai sonet leuger Coinda chanzon, pos a lei plai, De cui eu chan, q'es tan plasenz Q'als pros fai e als conoissenz Totas las autras desplazer E si honrar e car tener. Tant ai de joi e d'alegrer E tant son tuit miei consir gai Qe capdelar cuit tot l'emper, Quant m'albir cum d'amor me vai; E cel q'esser volra sabenz Qals es cil de cui sui jausenz, An la genchor del mont vezer, Q'esters noill lo aus far saber. Car envejos e lausengier Per cui mainz bes d'amor dechai Men fan paor, per q'en suffer Qe mon joi non dic ni retrai, Anz faz cujar a mantas genz Q'aillors sia mos pessamenz; E puose o ben far senz temer, Pos mos fis cors en sap lo ver. Complit son tuit mei desirer, Pos cil, dont mos cors no s'estrai, Me reten per son cavaler, Qui qe n'aia dol ni esglai. Per aizoil sui tant ben volenz, Qe totas las autras valenz Nom poirion tant far plazer, Per q'eu partis mon bon esper. La bell'ab lo cors plazenter, Pos da lei nom part nim partrai, Prec,seil plai, c'ab lo joi entier Mi socorra, q'atendrem fai Sa vermeilla bocha rienz; Q'aissi co ill promes eissamenz Lo deu atendre, al meu parer, Sel dreit d'amor vol mantener. A mon Restaur, qar es valenz, Al laus de toz los conoissenz, Faz mon joi e mon chan saber Car li plazon tuit mei placer. |
Metrical pattern: 382s