| |
|||
| prosody | miscellaneous |
Eu sai la flor plus bella d'autra flor E plus plazen, als ditz dels conoissens, En cui es mais pretz e valors e sens, E deu per dreich portar maior lauzor C'autra del mon, que hom saubes eslire, Car noil faill res de ben, c'om puosca dire; Qu'en lieis es sens, honors e cortesia, Gens acuillirs ab tant bella paria, C'om no la ve que non sia envejos Del sieu ric pretz poiat sobrels plus pros. E dic vos ben c'anc no trobet hom flor, Qui tant sembles coinda e sobravinens, Ni c'ab semblans doutz e gais e plazens Saubes poiar son pretz e sa valor, Tant cum ill fai, que hom non pot escrire Los sieus bos aips ni sa beutat devire E s'ieu no'n dic de ben tant cum devria, Per so men lais que dire nol sabria; Tant es sos pretz sobriers e cars e bos, Qui plus en ditz, mais i troba razos. E quim volgues enquerre d'esta flor Cals es ni don, bem ditz mos esciens Qui me n'enquier semblam desconoissens Puois tant au hom dire de sa ricor; Qu'il es de pretz al som, qui queis n'azire, E totz hom pros deu aver gran dezire Qu'el vis dels oills celei, cui totz jois guia, La bella flor el prat on es floria, Don ieu serai totz temps mais deziros, Que qui la ve totz temps sera ioios. Mas una ren dic ben de part la flor A totz aicels qez hom ten entendens De las prezans e de las plus valens, E qui sen fan saben e chausidor, Que tot enans c'om sa beutat devire Ni que de lieis vezer sia jauzire, Gart si mezeis qui'l es ni sis faria A lieis vezer; que, s'aisso nois taignia, Aprop l'esgart non sera poderos De ren parlar, tan tornera oblidos. Et es trop laig c'aprop tant bella flor Es hom pauzatz ab tans de marrimens Que noill puosca sivals sos covinens Dire e mostrar, ni'n tan clar mirador Nois taing que ja s'esgart hom nis remire, Si de bon pretz n'es amans e servire; Car si'l es pros, ab l'esgart doblaria Lo pretz el sens, qu'en cent dobles valria, Don totz temps mais desirans e cochos Deuri'estar del sieu cors amoros. Chansoneta, vai, ten la dreita via, Lai en vers Est, on fis pretz cabalos Soiorn' e iai ab la meillor c'anc fos. |