prosody | miscellaneous |
Pois vei quel temps s'aserena E s'esmera e meillura, E per ioi de la verdura Quel bels temps clars nos amena, Estera ben qu'ieu chantes Si pogues e m'alegres: Mas som tol ioi e chantar, C'ab amor non puosc trobar Merce; malamen mi mena, Que sol de mi non pren cura. Ben pert m'ententa e ma cura, Cum cel que geta en l'arena Lo blat e ara e semena E sofre fam et endura Per so c'a pro li tornes, E pert son trebaill ades; Mas nuills hom nois pot gardar Que lai nol convegna anar, Mal son grat, on s'aventura E s'escarida lo mena. Lai ois vol amors mi mena Noi garda dreich ni mesura, Per q'ieu sui en greu rancura C'atressi cum la balena, Quand li marinier son sus E cuida estar ferm chascus, Elals fai totz perillar; Atressi vol de mi far Amors; quand aissim malmena, De mort sui en aventura. Mout es estragn'aventura. Ai las, cum sui en greu pena Qe car mos cors nois refrena D'amar lieis, que tant m'es dura, M'es sos cors escurs e brus; No sai que men disses plus, Mas en queis deu hom fiar, Quan so qu'ieu plus pens amar Fai enves mi desmesura Em mostra orgoill em malmena Peccat fai c'aissim malmena E noi garda ies dreitura. Ai, dompna, on totz iois s'atura, Per quem tormenta nim pena Tant fort vostr'amors ni vos Ja non vos es negus pros, Ni dels sieu mezeis baissar Nuils autz hom nois pot honrar; Sim don de vos bon'estrena Dieus, tortz es e desmesura. Mout es bella a desmesura Genta fresca blanca e lena Cill quem ten en sa cadena: De nuill ben non a fraichura; Molt es sos cors bels e bos E ill avinens e pros; No la puosc tant gent lauzar, Cum i saup totz bes formar Ab sotil saber natura: Mout en desir bon'estrena. Dompna, s'ieu sui enveios De clamar merce vas vos, Sapchatz, cocha m'o fai far, Per que nous deu enoiar, Qu'ieus am plus senes misura Que no fetz Paris Elena. Dompna, si razos vos par Per merce qu'o deiatz far, Aleujatz mi la greu pena Quem faitz sofrir aspr'e dura. |