prosody | miscellaneous |
Si co.l malaus qe no se sap gardar Qan es garitz, per qe.l mals lo repren E.l fai trop peig en son recalivar Qe non a faich, aisi m'es pres e.m pren Del mal d'amor dun sui recalivatz: Qar no.m gardei qan eu n'era escapatz, Ar ai tal mal dun jamais non garai Si no.m garis la bella per cui l'ai. Pero, si tot mals es, del mal clamar D'amor non voill ges del tot garimen, Qar totz.m es douz l'afanz per soffertar, Qan pens qi es, ni dun, ni de qal gen Cil per cui muor, a cui me sui donatz Ses estraire, si.ll plai o si no.il platz! Qar eu l'am tan ab leial cor verai, Qe, s'ill m'auzi, eu la merceiarai. Un pauc mi fai gilosia doptar, Qar totz lo monz enveia son cors gen E qar non puosc tan valer qe triar Non puosca ben amador plus valen: Pero, s'eu fos per leis a dreich jutjatz, Si com l'am mais en fora meillz amatz! Mas, com qe.m n'an, sobre totz l'amarai: Dunc falira se ves autra m'atrai. A, can mal vi sa cara, son cors car, E.l ric senblan, e.l bel aculimen, E.l plazen ris e l'amoros parlar, E.l douz esgart, e.l gai captenemen S'en breu no.ill pren merces tan soi cochatz Dels mals dun sui per s'amor tormentatz, Q'eu tem morir desiran son cors gai, Qar loing dels oillz e pres del cor m'estai. Ben dei Amor sobre totz merceiar Qar partit a mon ferm cor e mon sen De dompn'ab cor camjan, e.m fai amar Lei, on tuit ben son ses tot fallimen! Qar tan la fan sos prez e sas beltatz, Salvan s'onor, plazer, c'als plus prezatz Aug dir q'en lei non faill ren menz ni mai! Per q'eu nuillz temps de s'amor no.m partrai. Restaur, a vos mi ren a cui.m soi datz, E mercei lei qe.m fetz, camjan, camjar! Q'ab son camjar si adiran mi fai Amar qui es la plus plazens q'eu sai. |