| |
|||
| prosody | miscellaneous |
Tos temps serai ves amor Fis e ferms ab cor veray, Qu'amar e servir mi fay La plus bella e la melhor! E, si tot als no m'enansa, Tant creys sos pretz ab honor Qu'ieu prenc per paya l'onransa! Quar gent es de sidons payatz Totz fis amans qu'es en sidons honratz. E s'ieu anc sofri dolor Per amor, ni.m det esmay, Eras m'o torna en jay, Per que.l fenisc ma clamor! Qu'en tan bel plazer m'enansa Ab fin joy lieys cuy azor, Qu'ades viu ab alegransa Quant mi pes qu'ieu serai amatz, Si.lh pren d'amar negus temps voluntatz. Mas de lieys no.m don temor Que de so que pus mi plai No.m desvede, son cors guay! Que, quan ve el mirador, La gran beutat que l'enansa, Remembran son pretz aussor, Tem que non denh penr'esmansa Qu'a negun tanha s'amistatz: Tant es sos pretz ricx, e granz sa beutatz. Deziran torn en error Soven, quar tan luenh m'estay Delhs huelhs e pres del cor, sai Pero, si tot planc e plor, Quar vey pauc lieys que m'enansa Al sieu plazer, m'alegor Qu'ades remir per semblansa, On qu'estia, son cors e sa fatz: Mas ben m'agr'ops que.l semblans fos vertatz. Que quan remir sa color, Que par flors ab neu quan chai, E.l gen cors qu'a vida.m trai E sa gran valen valor, De lieys per cuy pretz s'enansa, Res no.m falh ni.m fai paor, Ans n'ai tan gran benanansa E tan de joy, e tan me platz, Qu'ieu poiria far jays totz los iratz. La valens dona s'enansa De Mison ab tal valor, Qu'entre nos viu ses eguansa De fin pretz, a laus dels prezatz, Salvan s'onor de lieys cuy mi suy datz. |