| |
|||
| prosody | miscellaneous |
Digatz mi s'es vers zo c'om brui, Sordel, q'en don prenetz l'altrui. Joan, lo joi c'amors m'adui De l'autrui moiller non refui. Sordel, paubertatz vos condui, Zo diz om, en joglaria. Joan, d'alre joglars non sui, Mas de ben dir de m'amia. Pos joglars non es, com prezes, Sordel, antan draps del marqes. Joan, eu non l'o prezi ges Mas per creisser joglar d'arnes. Sordel, tal joglar en cregues Q'eu sai qe.us sec noig e dia. Joan, per amor sui cortes E donei, e.m combatria. Sordel, re no vos vei donar, Mas e.us vei qerer e preiar. Joan, molt enoios joglar Ai en vos, no.l vos puesc celar. Sordel, lo vostre mendigar Blasm'om fort en Lumbardia. Joan, no vos auz encolpar D'enjan ni de fellonia. Sordel, vos respondetz molt gen, A lei de joglar aprenen. Joan, eu respon avinen S'es qui m'entenda d'avinen. Sordel, moiller trobatz truep len E ges no sai per qe sia. Joan, q'aicil, en cui m'enten, M'am'e no.i vueil compagnia. |