| |
|||
| prosody | miscellaneous |
Aitant ses plus viu hom quan viu jauzens, C'autre viure no.s deu vid'apellar! Per q'ieu m'esfors de viur' e de reinhar Ab joi, per leys plus coratjozamens Servir q'ieu am, quar hom que viu marritz Non pot de cor far bos faitz ni grazitz! Doncx er merces si.m fai la plus grazida Viure jauzens, pus als no.m ten a vida. Tant pes en lieys e tan l'am coralmens Que nueyt e jorn tem mi falh'al pensar, Quar de beutat ni de pretz non a par, Per que.l devon esser obediens Las plus prezans! quar enaissi es guitz Per dreg guidar, sos gens cors ben aibitz, Las pros en pretz, cum las naus en mar guida La tramontana e.l fers e.lh caramida. E puys guida.l ferm'estela luzens Las naus que van perillan per la mar, Ben degra mi cil, qi.l sembla, guidar, Qu'en la mar suy per lieys profondamens Tant esvaratz destreitz et esbaitz, Qe.i serai mortz ans que.n hiesc'e peritz, Si no.m secor, quar non truep a l'yssida Riba ni port, gua ni pont, ni guerida. Dura merces e trop loncx chauzimens Me fan murir per sobre dezirar, Quar ieu no puesc ses lo joy vius durar Qu'ie.l quier sirven aman ab tals turmens Que.l jorn mil vez volri'esser fenitz, Tan mi destreing lo dartz don sui feritz Al cor d'Amor, per qe.l mortz m'es ayzida Car il no.n es tot eissamen ferida. Las don li ven de mi aucir talens, Pos q'ill no.m pot en nulh forfach trobar, E ja per mal que.m sapcha dir ni far, Non puosc esser de lleis amar partens Doncx, e que.lh val si.m fai mal ni.l me ditz C'aissi.l sui ferms autreiatz e plevitz! Qu'enans sera m'arma del cors partida, Qu'ieu me.n parta, tan l'am d'amor complida. N'Agradiva, dompna de pretz razitz, De cor, de cors e de faitz e de ditz Suy vostres totz, quar etz la mielhs aybida Neta e plazens, suaus et yssernida. Per Dieu, aiatz merce, dompna grazida, De me, qu'en vos es ma mortz e ma vida |