home page ?


Qan q'ieu chantes d'amor ni d'alegrier
Ni de dompnei, er vei que m'a mestier
Q'ieu chant de gerra, e per gerra m'esgau,
Q'en totz bons faitz dei tener dreich sentier!
Car tuich bon aip taignon a cavallier
Q'es ab mi donz qe ten de pretz la clau.

Si tot son mal e fer nostre gerrier,
Eu los tem meins pois sui e mon destrier,
Qand eu los vei, que s'om los me mentau!
E si.n trob un, descortes lausengier,
Sa moillers sai que se vistra de nier,
Per que l'es ops qe.is gart de mon esclau.

Cel qe.l conois lo ten per messongier,
Flac e volpil, avol et ufanier!
C'ab croi semblan, fals avinen, soau,
Se feing cortes, e non val un denier!
Qe.il dich son gros e.il faich son menudier,
Per q'entre.ls pros non es prezatz un clau.

Ja no.m tenga negus per sobrancier
De so q'ai dich, si ben fauc gab sobrier!
Qu'eu no.l menatz mas segon que m'en lau,
E s'ieu.l cossec, l'oltracuidat parlier,
Ja no.l garra totz l'aurs de Monpeslier
Ab tans de marcs cum ha codols en Crau.

Laich se dechai dompna ab pretz vertadier,
Si.l fai d'amor nuill semblan plazentier,
Ni.s pliu en lui, ges non ve be ni au:
Car negus hom non l'am ab cor entier,
Pois en amor de tal fai destorbier.
Ar n'ai dig pro, per que mas denz enclau.

Serventes, vai dir al fals ufanier,
Qe mal vic mi e mon corren destrier
E lieis per qe m'a faich enic e brau.