home page ?


Atretan dei ben chantar finamen
D'invern com faz d'estiu, segon rason,
Per c'ab lo freitz voill far gaia canson
Que s'en pascor de chantar cor mi pren,
Quar la rosa sembla lei de cui chan,
Aultresi es la neus del sieu senblan:
Per qu'en andos dei per s'amor chantar,
Tant fort mi fan la rosa e.l neus menbrar.

Sobra totz am domna pro e valen,
Don m'a mestier ric cor tota sason
En ben amar, qar mesura semon
C'om aia cor segon los faitz c'on pren!
E car e.n pris tal amor, con que n'an,
Que desotz mi n'an domnas tuit l'aman,
Cor ai que.ls fins vensa de ben amar
E.ls plus valens, s'eu posc, de miels a far.

Quan ben m'albir e mon ric pensamen
De llei quals es a qui m'autrei e.m don,
Tan l'am, qar val part las plasenz que son,
Qu'endreg d'amor tenc chascun'en nien,
E quar non sai autr'el mon tan presan
De qu'ie.n preses plaser jazen baisan,
Qu'eu non voill ges nul fruit asaborar
Per que lo dolz me tornes en amar.

Miralz asir, quar trop mi son nosen
Ab lei qui.m fai languir en sa preison,
E quan mira son cors e sa fason,
Pensan quals es, pauc presa mon turmen!
E doncs li van li oill el cor baissan
L'orgoill per que met m'amor en soan:
Tan mi ten vil e tan si ten en car,
Quar viu de pretz e de beutat ses par.

E qui fai tot qan pot de ben, sirven
Sidonz, segon que.l dret d'amor despon,
Segur l'en pot querre lo gueserdon,
E sil l'en deu ben far, si.l dret n'enten!
Per qu'eu en prec midonz, merce claman,
Que per nuill dretz gueserdon no.l deman:
Quar il val tan, que no.s pot engalar
Negus servirs al seu geserdonar.

Si co.l soleillz esfassa, quan resblan,
Autras clardatz, vai de pretz esfasan
Autras dompnas la comtess'am cors quar,
Sil de Rodes, ses ma domn'esfassar.

La comtessa no.m deu ges asirar,
S'ieu am ni pretz lei don sui hom sens par.