| |
|||
| prosody | miscellaneous |
Mant home.m fan meravilhar, Car soy d'aitan pauc enveyos, Car degun aver no m'es bos, Mas cant per metr' o per donar! Car qui ten son thezaur entier Mil marc non valon un denier, Car nulh avers ad home pro non.te, Mas so qu'en met per pretz o per merce. De trop sobras si deu garar Qui vol esser valens ni pros, Ni de sofracha vergoinos! Car qui a fag e no pot far Vieu malastrucs ab dol sobrier! Per que.s deu metr'el dreg sentier De mezura ap pretz qui pretz mante, Que.l trop no.l tanh e.l pauc y descove. Lunh pretz cort non pretz un denier! Mas qui vol aver pretz entier Sapcha metr' en son afar sobrefre, Que so qu'enpren puesqu'en pes tener be. |