prosody | miscellaneous |
Dompna, meillz q'om pot pensar Leials e fins ses cor vaire M'autrei per totz temps amar Vos, a cui non aus retraire Mos mals, per q'eu muor temenz! Qar e.us am tan coralmenz, Qe, si.us plaz o no vos plaz, Vostre serai tro al morir: Qar totas autras amistatz Met per vostr' amor en air. Plus no.m poc Amors honrar Qan me fez ves vos atraire, Qe anc Deus non volc formar Gensor dopna, a mon veiaire, Qe.l cors a dreg e plazen, Cara douza e rizen, E natural la beltatz, E.l cor ses voler de faillir: Per q'en vostra merce sui datz A totz vostres manz obezir E si.m fai ren desirar Amors, qe non deiatz faire, Per merce vos voill pregar Qe no.m fassatz pauc ni gaire! Qar mais am viur' ab turmenz Qe vostre prez vailla menz, Dopna, per re qe.m fassatz! Q' asatz ai de vos, cui dezir, Sol qe de bon cor me suffratz Qe vos posc' amar e servir. Tan vos fai bel remirar, Plazens dopna e de bon aire, Q' ab fin joi non puosc estar Pos sui loing del douz repaire On es vostre nous cors genz! Anz isco d' entre las genz Toz sols, soven, apensatz, E vos, dopna, pensan, remir. Per q'es per mi qe.us airatz, Qe.m tol pessamen e consir Ja nuills temps no.m poiretz far, Pros dompna, tan de mal traire, Q'eu no.s si' al merceiar, Pos de vos no.m puosc estrar, Q'amors me forza, e me venz Vostra beltatz, e mos senz Me diz qe.m tengn'a pagatz De tot qan volretz far ni dir! E si vos platz qe m'ausiatz, Ja Deu mercei a mon fenir. En vostra merce sui datz, Dopna, per viur'e per morir, E, si vos platz qe m'ausiatz, Ja Deus no.m sal s'eu voill garir. |