| |
|||
| prosody | miscellaneous |
Ab mil volers doblatz de fin' Amor A la gensor et ab mais de plazers Qu'ieu sai el mon m'autrey e-m suy donatz, Quar tan mi platz sos belhs cors covinens E sos ricx pretz grazitz per totas gens Qu'on plus cossir l'ardimen e l'erguelh Qu'ieu fas quar l'am, adoncx pus la dezir, Aissi cum selh que vay, sabens, murir Lai on pus ve combatre ni defendre. Quar tant esders son pretz en gran ricor Que ma valor mi sobrevens temers Per trop-amar e quar sai qu'es vertatz Que-ls pus prezatz fai totz doptos mos sens. . . . . . . . . . . . . . . . . . . . . Amors me bat tan fort que totz m'en duelh! Doncx segrai la, mas no sai on me vir Del combatut que mays no-s pot guandir Et a merce al pus pros si vai rendre. E-l sieus vezers m'a tan doussa sabor Que ges alhor non es mos bos espers, E si del tot suy vas lieys encolpatz Es quar forsatz l'am et es tan valens E cum amicx vuelh far sos mandamens E quar li plai ni an chauzit mey huelh Ni quar de lieys son tug mey bon cossir E quar li platz qu'ieu, ses pus, la dezir Que, s'era reys, tart mi pogra rependre. E quar es vers que la fresca color Laus e-l doussor que fai lo sieus vezers E sos belhs ayps e sas plazens beutatz, Quar pus lauzatz fora-l cors avinens, Gras, blancx, delguatz, caps de totz jauzimens, Qu'ieu ja-l vis nut cum viu dins son capduelh, Quar mielhs pot hom lauzar senes mentir Aquo que ve que quan fai per albir, Et ieu vuelh gen vers laus en lieys despendre. Quar jorns e sers sopley e-l port honor Ab gran temor, tant es paucx mos sabers E si-nfra lieys. mais non sera trobatz Belhs dos honratz si lai on Chauzimens Es ab belhs digz e fagz complidamens, Ni don poiray aver aigua, si-n vuelh, Si-n mar no-n truep e lai la vau querir. Doncx, si Merces de lieys no-m fai jauzir Ja mais alhors no-m fara jorn atendre. |