| |
|||
| prosody | miscellaneous |
Malvaza m'es la moguda D'estiu, don val meins mos chans, Que gaieza m'a tolguda, No fes e trics e soans, E sui·n alqes envilanitz: S'ab mi donz no·m val faitz ni digz Non sai per qe·m chantes ja mais. Amada l'ai e volguda Totz temps per far sos comans Deis lo temps q'ieu l'aic vehuda, C'anc vas lieis non fui camjans! Non dic ges q'ieu sia trazitz, Mas ben puosc entre·ls escarnitz Sezer entro l'ira m'abais. Aissi·m vens e m'esvertuda L'amors qe·m forss' e·l talans Q'ieu non pretz, si-la·m refuda, Ses lieis tot lo mon dos gans. Del sieu gran tort—si·n er' auzitz— Li clam merce qe·m fos fenitz E penda me s'ieu mais m'irais. Verais Dieus, don m'es venguda Esta voluntatz tant grans Que tant ni qant no·is remuda E pois alres no·i enans Ben gran mestier m'en agr' oblitz O qu'estes totz temps endormitz, Que sivals en sompjan n'ai mais. Aqesta mi' atenduda Q'ieu fatz, c'aillor no·m balans, Cre q'er a la remasuda Del puoig que brugic set ans, Puois no·n issic mas la soritz! Tant m'es mos afars per faillitz C'ab promessas ses faitz mi pais. De cortes luoc mou la razitz E·l jois q'es dinz mon cor floritz, Don ma bon' esperanssa nais. |
Metrical pattern: 376e