| prosody | miscellaneous |
Dompna, ieu vos sui messatgiers, Et el vers entendetz de cui, E salut vos de part cellui Cui vostre jois alegr' e pais. E sapchatz ben: des er' oimais Vostre messatges vertadiers Serai del vers, qu-i qe-l vos chan: De totz los autres cavalliers Vos deffen l'amor mas de lui, Q'el es de ric pretz ed astrui E sa proeza creis e nais! E si amar devetz ja mais, Lui prec que ametz voluntiers Q'el non a per c'om lo soan. Tant es en vos sos cossiriers Que tot autre joi en defui, Et autre volers no-i l'adui Ma-l desirs qe-l ten en pantais. Desirant, cre, morir se lais Q'el trai pieitz c'altre carceriers Q'el non muor, ans languis cuidan. L'amors qe-l venz e-l deziriers L'ant si destreich que ses autrui Parl' atresi cum s'eron dui, C'a si mezeis ditz quan s'irais: Ai cors, per que m'aucis ni-m trais Que fals faras e que leugiers Si -naissi m'aucis desiran. Ja pelz enojos lausengiers Per cui Jovens baiss' e destrui No-il toillatz lo joi ni-l condui Ni-l bon esper don el si tais, E pos anc no-is rompet ni-s frais Vostre pretz qu'es a totz sobriers Non comensetz en lui engan. Q'engans es e cors volatgiers E blasmes don totz lo monz brui D'amic qan si feing ni s'esdui Vas cellui qe l'es fis verais! Qu'anc no-us fetz fencha ni escays Anz es humils e plazentiers Vas totz, c'uns no l'en tenga dan. Sabetz quals es lo reprochiers: Qui sobre l'aur estaing endui L'amor e-l sojorn escondui, E, si res li torn' en biais Et apro lo ben ven l'esmais, Lo rics jois qu'es vengutz premiers Sobrevenz l'ir' e vai falsan. Non sai cals s'es lo cavalliers, Mas s'ie-us en prec :non vos enui De l'ira qu'aviatz ab lui Que per m'amor no-n si' oimais, Anz prec q'en sia fis e pais! Tant sui vostre bons conseilliers, Non i doptetz, q'ie-us o coman. Bos vers, s'ab Merce la-m conquiers Mieils serai sieus qu'anc mais no fui, Q'en aitant cum soleils relui Es la mieiller qu'el mon s'apais E-l genser e sil que val mais, Per q'ieu remir plus voluntiers Son pays que totz mi resplan. Per sol lo bon pensier engrais E-l volers es tant sobranciers Que tot' autr' amor nore blan. |