| |
|||
| prosody | miscellaneous |
L'autre jorn, per aventura, M'anava sols cavalguan, Un sonet notan! Trobey toza ben estan, Simpl'e de bella faitura, Sos anhels guardan. E, quant ylh m'auzi chantan, Trays s'enan, E pres me pel fre e jura Qu'anc tan mal no fezi chan, E cridet Robi no·s n'an. Toza, belha creatura, Fi m'ieu, cal forfag tan gran Vos ai fag si·m me chan Ylh respon ab mal talan: Quar lieys qu'era fin'e pura Apelletz d'enjan. E Robis venc ab aitan, Menassan! Mas, quan me vi, m'asegura, E·m ditz que no·y penrai dan! Qu'assatz n'ay ieu pres ogan. Mas, quan vi qu'elh non a cura Que·m fezes ren mal estan, Ylh s'en va ploran, E Robis dic sospiran: Pauc val merces ni dreytura, Lai on poder an, Per qu'ieu tenc per fol aman Qui las blan, Quar aitals es lur natura, Que dels falhimens que fan Volon nos sufram l'afan. Robi, laissatz la rancura, E cercatz, que·us o coman, Tal que no·us enjan! Et ieu amarai Duran, Que·m vol donar tal centura Que val un bezan, E vos no·m donetz un gan, D'aquest'an, Ni no·us peza·l desmesura, D'est fol mal dizen truan, Per que m'anatz encolpan. Mas Robis, cum folatura, Que que s'agues dit denan, Vai s'umilian! Mas ylh no l'au per semblan, Anz fuy on plus la conjura, E·l fols sec prejan. Et ieu qu'els vau remiran Que faran, Met m'apres en l'ambladura! Mas pero no·m cochey tan, Que no·ls encontres baizan. E dissero·m en gaban Que m'en an Quere merce ni dreitura A lei don menti chantan, E que m'en lais ab aitan. Et ieu que·ls vi embrassan, E baizan, Prec Dieu que·m don aventura Qu'ieu trop dona ses enjan, Ab que fassa so qu'els fan. |
Metrical pattern: 655