| |
|||
| prosody | miscellaneous |
Gui d'Uissel, be-m pesa de vos, Car vos etz laissatz de chantar! E car vos i volgra tornar, Per que sabetz d'aitals razos, Vuoill qe-m digatz si deu far egalmen Dompna per drut, qan lo qier francamen, Cum el per lieis tot qant taing ad amor Segon los dreitz que tenon l'amador. Dompna Na Maria, tenssos E tot cant cujava laissar! Mas aoras non puosc estar Qu'ieu non chant als vostres somos! E respon vos de la dompna breumen Que per son drut deu far comunalmen Cum el per lieis ses garda de ricor: Qu'en dos amics non deu aver major. Gui, tot so don es cobeitos Deu drutz ab merce demandar, E dompna pot o comandar, E deu ben pregar a sazos! E-l drutz deu far precs e comandamen Cum per amiga e per dompna eissamen, E-il dompna deu a son drut far honor Cum ad amic, mas non cum a seignor. Dompna, sai dizon de mest nos Que, pois que dompna vol amar, Engalmen deu son drut onrar, Pois engalmen son amoros! E s'esdeven que l'am plus finamen, Els faichs, els dichs en deu far aparen, E si ell' a fals cor ni trichador, Ab bel semblan deu cobrir sa follor. Gui d'Uissel, ges d'aitals razos Non son li drut al comenssar, Anz ditz chascus, qan vol prejar, Mans jointas e de genolos: Dompna, voillatz qe-us serva franchamen Cum lo vostr'om! et ella enaissi-l pren! Eu vo-l jutge per dreich a trahitor Si-s rend pariers e-s det per servidor. Dompna, so es plaitz vergoignos Ad ops de dompn' a razonar Que cellui non teigna per par, Ab cui a faich un cor de dos! O vos diretz, e no-us estara gen, Que-l drutz la deu amar plus finamen, O vos diretz qu'il son par entre lor! Que ren no-il deu lo drutz mas per amor. |