prosody | miscellaneous |
N'Elias, de vos voill auzir, Car vos faitz d'amor conoissen, Car seria meills a sufrir A cel qui ama finamen, Qu'a mes tot son cor e son sen Totz temps en aver amia: Se, cant l'a, ella moria, O si per altre-l gurpia De qui no-ill fos tant avinen Cosin, so es leu a chausir Me que non ai cor recrezen. Ans q'eu lais m'amia morir, Li sofr' un pauc de faillimen, Qu'enans l'en soffriria cen, Puois de fin cor l'amaria! Que ben leu la-m cobraria. Mai s'ieu morir la vezia, Non viuria pois longamen. Et avetz mi partit razo, Dond non posc ses ira passar! Mas eu vos farai alegrar, Qual que prendatz de ma tenso, E veirai si sabetz chausir D'aquesta razon novella: Qu'ajatz dona bona e bella Un jorn d'estiu o una nuoig d'invern Mal sabetz chausir e partir, N'Elias, e faitz lo parven, Qu'atressi volriatz faillir! Mas ieu-m tem tan galiamen Per qu'eu voill mais e m'es plus gen S'ela mor que si-m galia! Et a leis cre que meills sia Que s'ab blasme s'aucisia, E qu'aucises me eissamen. E chausisc la coingda sazo, Quant aug los auzeletz chantar, E-l clar jorn, per mon joi doblar Quant remir sa bella faisso, E vos lais que voletz dormir La nuoig ab la viella, sella Que no-m par sia piucella, C'ab leis estias, en clar jorn, ab enfern. De fin drut non taing que s'azir, Cosin, e trobatz ho legen: De faillimen pot hom guerir, Mas en mort non ha garimen Aissi avetz petit de sen: Be-us i faill vostra clercia! Que-l plus savis si desvia, Per que mos cors s'umelia Vas leis, sitot il si mespren. E voill en chambra o en maiso Tota nuoig ab midonz estar E leis tener et abrassar! E ja no voill chant d'auzello, Car per ren no-l poria auzir! Car cui fin' amors capdella, Non sap d'auzel qui favella, Anz endreg se ten lur gaug ad esquern. N'Elias, aisso que-us aug dir, Sai qu'aras tenetz a nien! Ben ez francs, car sabetz suffrir Que donna-us lais per meinz valen! Mas ieu am per aital conven Que no voill que-m lais m'amia, Anz vuelh sa mort, s'o fazia! Qu'ilh vol la soa et la mia, Can fai zo que no-ill estai gen. E si de nuog vos sap plus bo Vostre donz tener c'ab jorn clar, Doncx n'ai eu gaug c'ab l'esgarar! E per que no-m digatz de no, Faza-n dreg Na Maria dir, Cui jois e pretz renovella, E fara sen, si apella Na Biatritz, la bella, de Tiern. N'Elyas, si vostra amia Vos trai la nuoich ni-us galia, Vos l'amatz per cocha d'argen. Clergart, be-us trembla-il cervella! Per una veilla fradella Anatz brandan, cum fai naus ses govern |