home page ?


Atressi com lo leos,
Que es tan fers quant s'irais
De son leonel, quan nais
Mortz ses alen'e ses vida,
Et ab sa voz, quan l'escrida,
Lo fai reviure et anar,
Atressi pod de mi far
Ma bona domn'e Amors
E guarir de mas dolors.

Totas las gaias sazos
Venon et abrils e mais:
Ben degra venir oimais
La mia bon'escarida
Trop s'es Amors endormida,
Que-m donet poder d'amar
Ses ardimen de preiar.
A, quantas bonas honors
M'a tout temensa e paors

Rics fora lo guizardos,
E mot fis e mot verais,
Per que m'abellis lo fais,
Si sa merces no m'oblida.
Aissi con de nau perida,
Don res non pot escapar
Mas per forsa de nadar,
Atressi for'eu resors,
Dompna, ab un pauc de socors.

Marrit mi ten e ioios,
Soven chan, soven m'irais,
Soven magris et engrais,
C'aissi s'es e mi partida
Amors ioios'e marida
C'ab rire et ab iogar,
Ab consir et ab pensar,
Mostra sas ricas valors
A mi entre-ls ris e-ls plors.

Totas las bellas faissos
Del mon son en vos e mais,
Domna, qu'anc bes no-i sofrais,
De totas valors complida.
Si fossetz d'amar ardida
Ren no-i progr'om meillurar!
Ab tot so est vos ses par,
E murs e castels e tors
D'Onor e de Beutat flors.

Domna, Dieus vos salv e-us gar,
C'om ren no-i pot meillurar
En vostras finas lausors,
Mais per vos m'auci Amors.

M'arm'e mon cor ies no-m par
Ne ieu e mon cors estar
Qe sai null'autra ricors
No-m tengra, ni murs ni tors.