| |
|||
| prosody | miscellaneous |
Si co-l soleilhs per sa nobla clardat Hon plus aut es mais dona de calor E-ls plus bas luocz destreinh mais per s'ardor Que-ls autz, car son pe-ls vens plus atemprat, Tot atressi ma donna, casta, pura, Auta de pres, destreinh me plus formen, Que-m trobas bas et a tot son talen, No fai un ric, en cui Amors peiura Car erguelh y consen. Be-m troba bas et a sa volontat Sella qu'ieu am ses tota fals'amor, Car aysi-m ten en fre et en temor Con lo girfalcs cant ha sobremontat Fay la grua, que tan la desnatura C'ap sol son crit, ses autre batemen, La fa cazer e ses tornas la pren: Tot enaisi ma donna, hon pres s'atura, Me lia e-m lassa e-m pren. Be-m lia e-m pren ma donna e-m fer e-m bat E-m fay languir sospiran ses dolor E-m art lo cor ab un fuoc de dousor Que m'a mes ins entre-l cor e-l costat, Si co-l flametz, que ses tota mezura Art lo leon ab son espiramen, Mas ilh val tan que hon plus m'art soven Plus mi reven ab una pauca cura D'un dous esgart plazen. Tant m'es plazens plus lo vey mais m'agrat Del sieu bell cors, e mais vais leys azor, E fora dregs que gardes sa honor, Se li plagues, que n'agues piatat, Que-l fuocs que m'art es d'un'aital figura Com plus m'en loinh mais n'ay descalfamen: Tot enaisi co-s bainha dousamen La salamandra ins en fuoc sen ardura E-n tray son noirimen. Ieu fuy noirit en petita etat Qu'ieu la lauzes e dises sa valor, Don suy plus ricz que nulh enperador Can sella m'a de sos hueilhs esgardat, C'aisi gardan m'enantis e-m meilhura, C'ades mon cor trop vays leys plus sofren Que-l filhs del duc per Sangua l'avinen, Can la laiset sobre sa vestedura Ala fon en durmen. |