prosody | miscellaneous |
Anc enemics q'ieu agues Nuill temps no-m tenc tant de dan Cum mos cors e miei huoill fan! E s'ieu ai per lor mal pres, Ill no-i ant faich nuill gazaing! Qe-l cors en sospira e-n plaing E-ill huoill en ploron soven, Et on cascus pieitz en pren Plus volon, qecs, obezir, Lai don sento-l mal venir. Per que m'agr'ops, s'ieu pogues, C'al cor e als huoills, qe-m fan Aver de ma mort talan, Fugis, mas ieu non puosc ges, Anz m'atur e m'acompaing Ab lor, e fis sers remaing A l'adreich gai cors plazen Cui ill son obedien, E-l vuoill onrar e blandir E gen lauzar ses mentir. Mas una aital sazos es Que li plus leial aman E cill q'amon ses engan Son soanat e mespres, Et aicill a cui sofraing Tot quant ad amor s'ataing Son volgut, e non es gen C'amors fasa lui gauzen Que non sap los bens grazir E-ls mals, qan los sent, sofrir. Mas de mi vol cui ten pres Que fassa tot son coman, De lieis que no-m vol ni-m blan Ni-l platz res c'a mi plagues! C'aissi-m pren cum pres Galvaing Del bel desastruc estraing, A cui l'avenc far coven Que fezes son mandamen, Et el no-il dec far ni dir Ren qe-il degues abellir. Ab aital coven enpres Sui sieus, que plus no-ill deman, Mas cossir e vauc penssan Cum ieu sos plazers fezes! Qe-l ditz fenis s'am refraing Qui dis que braus cors s'afraing Qui gen lo serv humilmen! Per q'ieu ges no m'espaven, Tant l'ai cor de gen servir, Q'ella ja-m laisse morir. Mas pero pieitz de mort es Qui vai languen desiran E aten e non sap qan Li volra valer merces! Puois ai pieitz, per qe-m complaing, Q'en un jorn fenis e fraing So c'om a conquist greumen D'Amor, e al mieu parven Degra poignar al fenir Aitan cum al conquerir. Seign'En Savaric, mout plaing Gardacor, car per estaing Camjet son aur fin valen, E-l clar maragde luzen Per veir'escur que luzir Non pot mais ni resplandir. |