| prosody | miscellaneous |
Chanzos q'es leus per entendre Et avinenz per chantar, Tal qu'om non puescha reprendre Los motz ni-l chant esmendar, Et a douz e gai lo son E es de bella razon Ed avinen per condar, Mi plai e la voil lauzar A qi la blasm' e defendre. E aicel qe vol reprendre Nesun hom del seu trobar, Deu premierement aprendre Com el puesca razonar Per dreig zo qe-n vol razo, E se-l tortz es sieus o no, Si qu'el s'en puesca salvar! Mas no-s fai a chastiar Hom fols ne ab lui contendre. Savis hom qe vol emprendre Null grant faig ni comenzar, Deu primeiramen atendre Entro que-l veia per clar S'el fai sen o faillizo! Qe fols es qi mou tenzo E non puesca guerreiar, Don li convengn' ad anar Per forza s'a merce rendre. Huei mais n'er ma dolors mendre, Car aug caser e baisar L'orguoyll e-l poder deiscendre D'En Aiselin e mermar, E tut li sieu dan mi so Legretatz mais ce miei pro E-l siei gioi mi fan plurar E-l siei enuoi alegrar E di bes lo cor atendre. Mal l'an fait son temps despendre Li lag faig que'il a faig far: Donnas ardre e enfanz prendre E piuzellas espadar E mainta religio Metr' a fuoc et a carbo Don arz so crotz et altar. Hai, Deus, com podetz estar D'aitals fals venjanza prendre Se Dieu e breu de saisos De lui non prent vengiasons, Mantas giens fara lagnar De si e fara cudar C'il lo voylla en gratz prendre. |